Nostalgia

VIA MILANU
T'a ricùardi tu, o 'Nto' chira 'mpetrata
da cas' e zu' Natale ara caserma?
lo l'haiu sempre a ssu core 'nchiovata
fin'a quannu ppe sempre nu' sse ferma!
Ah sse petruzze! Pàrica me pàrranu

Una pped'una: - Bìaddu, sìanti, guarda,
su' già jurut'e ros'e Mastru Carminu
o cum'è bella ss'ortenzia 'e Sperarda!
Sìanti cchi bell'arduro chi se spanna?
Nun t'affannare cchiù, ferma stu passu,
vena d'u fuacularu 'e za' Marianna:
se sta frijiannu patate ccu grassu!
Rimàna ancore ccà, ppecchl 'un te fìarmi?
Rosin'e Vecchia sta faciann'u siricu,
vìani a toccare ancore chiri viarmì
cumu facìe na vota, ccu ru jìritu.
'U vi'? C'é zu' Michele u Califanu,
'Ntoni Ferriari, Cummari 'Nciuànna,
Rusarina, a cchiù bell'e via Milanu
'a vi'? Stadi affacciat'e l'atra banna.
Férmate na muddica, cchi t'affanni?
Fermate ancore cca, aru scanzaturu,
ca n'atra picca arriva ppuru Giuànni
e 'ncignàti a jocare a battimuru.
Ti nne ricùardi? Avìe curti i cauzùni
e benìe ccà, ccu nu culicchiu a tùmmaru,
e ppe bbidìre volare i picciuni
ne minàsti timpate a ssu cacùmmaru!
U jùacu era ppe nnùe na cosa seria
(Ca tannu 'un c'era ra telavisione)
scinnìa fin'ara cerza d'a Valeria
ppe me jìr'a ricògliare u pallone!
- Figliuma, attentu, nun te fare maleme
facia mamma ccu na manu izàta.
U rùaddu, u strùmmulu, a mazza, u pizzale
chissa era a vita. Fin'all'umbruliàta!v Ma ti nne parad'ura de tornare?
Sempre attaccato a ssu cagnu de jùacu!
Camìna ìntru si nu' bbùe abbuscare!
Vianitinne c'a pasta è supr'u fùacu!
Tornava mamma: -N'atra pocu scura!
Quannu tùarni t'a fazzu a paliatura!
Io me godia chidd'ariedda pura
Chi mina sulu ccà viarzu chidd'ura!
A sira pue, ara tavula seduti,
éramu frischi, cumu rose, ancore.
Si gridàvanu nùe stavìamu muti
sempre cc'u cannarùazzu 'e jìre fore.
Doppu, ar'ammucciatèdda, cum'u vìantu,
ne mintìamu, nue, érrami, a jocare,
u tùaccu. Unu cuntava fin'a cìantu
e tutti l'àutri ne jìamu 'ammucciare!
Ed ammucciàtu 'mmìanzu a chiri jùri
sentìa ru core chi vattìa cchiù fforte!
Cchi zùmpi, cchi gridate, cchi suduri,
cchi cuntentizza avanti chire porte!
Quantu vote pue, ppe nu' ffare scrusciu,
jìa a m'ammucciàre arrìadi certe ligna
- Nìasci de ddùacu tu, ca te canùsciu;
t'haiu trovatu. E mo' cuntare 'ncìgna!
Torna ra notte. S'astuta ogne lume,
intr'u scuru se senta ssul'u viantu
e a ninna nanna duce 'e chiru jùme
chi ormai de tantu tìampu cchiù nu' ssìantu!
Furnìa l'astàte, pue venìa l'autùnnu,
e s'accurtavan' e jornate belle,
prima de jìre 'n giru ppe ru munnu,
ccàdi se ricoglìan'e rondinelle.
Ed io, chi m'e gustava d'u barcune,
penzava: -'U vidi u tiampu cumu vola?
Cumu ss'aggìaddi 'e supra u corniciùne!
E 'mmùcca me venìa sapur'e scola,
sapur'e luntananza, de partenza,
cchi gliòmmaru intr'u pìattu! Facia mmale!
Friddu, paura, tanta sofferenza
me portava ccu mmìe supra u postale!
U vìarnu ammece, màmmama cchi china!
Si jazzàva o chiovìa intru restava
e me gustava scuntìantu a lavìna
arriad'u vitru chi mi se 'mpannàva.
Cchi cuntentizza quannu a nive azàva
cà m'abbastava nu morzìddu 'e tavula,
supra d'a nive jànca pùe 'a posàva,
de ddà a ppennìnu cce facìa ra stràgula.
Aru cacùmmaru io, quannu russìa,
ancòre mo' cce minérra nu cute,
cumu vorra sentire ppe. ra via
chiru profùmu 'e patate frijùte!
Però a 'mpetrata é tutta cuveruta,
nun ce su' petre, nun ce su' scaluni.
E tutta chira gente dduv'è jùta?
Ppecchìdi nun ce jòcanu i guagliùni?
Ma no, ténanu tante cose bbone,
de strùmmuli e pizzàli cchi nne fanu?
mìagliu guardare a televisione
cà jìre érrami ppe bbìa Milanu!

Via milano è la via in cui sono nata e come me Gaspare Caputo autore della poesia in stretto dialettomartiranese, che diligentemente proverò a tradurre.